कविता - लामा कविता



शृंखला कविता : युद्ध / राजा पुनियानी ।

सिरिया
लाख लाख माइल टाढ़ा
यो कविले
तिम्रो बालकमा
आफ्नो मृत्यु स्वीकारेको छ
मलाई भोक लाग्दैछ
मृत्युको
मलाई अब जीवन जिउनु छ
सिरिया तिम्रो मृत्युको ।

#. युद्ध र बुद्ध


युद्धले पनि जीत भन्छ 

बुद्धले पनि


युद्धले पनि मृत्यु भन्छ 

बुद्धले पनि


युद्ध भूगोलको जीत भन्छ

बुद्ध मनको


युद्ध जीवनको मृत्यु भन्छ

बुद्ध मृत्युको मृत्यु


बुद्धभन्दा ठूलो युद्ध

कुन छ र

आखिर ?


#. चिहान


खोपिएको थियो 

त्यहाँको हरेक चिहानमा

इतिहासमा कहिल्यै कतै नलेखिने 

एक-एक नाम

जुन नाम

बुद्ध हिटलर लेनिन माओ पुटिन ट्रम्प 

कसैको थिएन

थिएन प्यालेस्टाइन कश्मीर दार्जीलिङ सिरिया 

कसैको थिएन

खासमा कसैको निम्ति थिएन

त्यो एक एक नाम ।


हरेक अँध्यारो मृत्युको चुम्बनले 

आबाद गरिदिँदै आयो 

उनीहरूलाई ।


- जहाँको सानो खिड़कीबाट देखिन्छ 

यौटा ठूलो आकाश

- जहाँको साँघुरो दैलोबाट निस्किएको हुन्छ 

हजारौँ खुल्ला बाटो

- जहाँको अँध्यारो भान्साघरमा पाक्छ 

रङ्गीचङ्गी सपना  


त्यो चिहान त

उनीहरूको 

घर हो ।


#. सिरिया  


१.

तिमी कफन बनाउनू

मेरो कविताको


आगो बाल्नू 

मेरो बिम्बहरूको


मेरो निकम्मा कविता अहिले 

घाइते छ

तिम्रो आलो चोटले


२.

सरी सिरिया

ऐले नै आउनु सकेनौँ ल 

तिम्रो आलो घाउहरू मलिदिन

तिम्रो रगते आँसुहरू पुछिदिन

तिम्रो भ्वाङ परेका घरहरू मुसारिदिन

तिम्रो नानीहरूको चित्कार छोइदिन ।

डियर सिरिया सुन न

हाम्रो भान्साघर हाम्रो आँगन हाम्रो गोरेटो

हाम्रो बारीकान्ला हाम्रो कुइनेटोघुम्ती हाम्रो चोक

हाम्रो स्कूल हाम्रो हस्पिटल हाम्रो खहरे

हाम्रो घन्टीडाँड़ा हाम्रो घोड़ाड़ाँड़ा हाम्रो जुनेली पाखा

हाम्रो कालीखोला हाम्रो भस्मे हाम्रो कमान

र हाम्रो सपना एक एक सिरिया भएर अहिले

भटाभटी कोमामा गएका छन् ।

एक छिन है सिरिया

होश आइहालोस् 

मेरो सिरियाको ।

किरिया हालेर भन्दैछु सिरिया -

हामी तिम्रै जस्तो सपनाको मलामी गइरहेका छौँ यतिखेर ।

तिमी उता बम चपाउँदैछौ 

हामी यता आफ्नै अनुहार चपाउँदैछौँ ।

किरिया होला सिरिया डियर सिरिया

अब समयले अमेरिकाहरू रूसहरू इज्रायलहरूको चिहान खनिरहेको समय आउन्जेल पख

सरी सिरिया

मिस यु सिरिया ।


३.

सिरिया भरिया हो

जहाज बोक्छ

तेल बोक्छ

प्रदुषण बोक्छ

भुइँचालो बोक्छ

बालुवाको आँधी बोक्छ

सिरिया भरिया हो

दक्षिण एशिया बोक्छ

अरब बोक्छ

भूमध्य सागर बोक्छ

लेबनान बोक्छ

इस्रायल बोक्छ

सिरिया भरिया हो

तानाशाहको घमण्डको कट्टु बोक्छ

आइएसआइएस-को सत्ता भोक बोक्छ

अल-काइदा-को लोभ बोक्छ

अमेरिकी साम्राज्य तिर्खा बोक्छ

विश्वयुद्धको छाड़ा छायाँ बोक्छ

सिरिया भरिया हो

सिरियाले आफैलाई बोकेछ भने

त्यो दिन सिरिया अरू नै केही बन्छ ।


४.

सिरियै सिरिया सिरियै सिरिया

एउटा सिरियाभित्र

एउटा दार्जीलिङ छ एउटा रोहिङ्या छ

एउटा म्यांमार छ एउटा भूटान छ

एउटा तिब्बत छ ।

सिरियै सिरिया सिरियै सिरिया

प्यालेस्टाइन छ एउटा बोस्निया छ एउटा

अफगानिस्तान छ एउटा कश्मीर छ एउटा ।

सिरियै सिरिया सिरियै सिरिया

एउटा सिरिया यता पनि । अर्को सिरिया उता पनि ।

अर्को उता । अर्को उता पर्तिर । अर्को अर्को उता उता पर्तिर ।

अर्को अर्को उता उता उता पर्तिर ।

एउटा सिरिया त मेरो देशभित्रको 

सिरिया मुटुमा पनि छ

जुन मेटिएको छैन अझ

जबसम्म मेरै देशभित्रको अमेरिका गिदीले 

ममाथि छर्दैन बमको बर्खा ।


५.

धुवाँले ढाकेको बिहान

भग्नावशेषमा किचिएको आधा शरीर घिसारेर निकाल्छ

र 

युएनओ-को दलाल गल्लीअघि 

खुन चुहिरहेको टाउको झुण्ड्याएर

उभिदिन्छ

सिरियाहरू

तब अमेरिकाहरू

त्यो खुन चाट्दै

आत्ममैथुन गर्छ ।

 जब बीबीसीले अत्तालिँदै फलाक्छ -

अमेरिकी राष्ट्रपतिले जोड़ दिएर फेरि दोहोराएर भनेका छन् टेररिजम नै विश्वको दुश्मन हो र अमेरिकाले विश्वकै रक्षाको ठेका लिएको छ ।


६.

सिरिया

तिमी त यहाँ नचिनिने भएछौ ।

तिम्रो अनुहार बमको बस्ती भएछ

तिम्रो आँखा रगतको ऐना भएछ

तिम्रो योनि चिहानको खाल्डा भएछ ।

सिरिया

तिमी त यहाँ नचिनिने भएछौ ।


सिरिया

तिमी चिनिएको दिन

अजनबी हुनेछ

यो तथाकथित युद्ध-सभ्यता ।


सिरिया

लाख लाख माइल टाढ़ा 

यो कविले 

तिम्रो बालकमा

आफ्नो मृत्यु स्वीकारेको छ

मलाई भोक लाग्दैछ

मृत्युको

मलाई अब जीवन जिउनु छ

सिरिया तिम्रो मृत्युको ।


८.

जब संसारकै तमाम कविहरू

सिरिया कविता गर्दैछन् 

तब सिरियाको सिरुवा खाइरहेको 

भँडुवा अ मे रि का डकार्दैछ युद्धको ह्याङ्गोभर

अ मे रि का सुनिराख् फेरि एक चोटि

हरेक अ मे रि का को गर्भमा एक एक भियतनाम छ ।


९.

ओ सिरिया पर्खेको छ

अबको पराजित संसारले एउटा अर्को भियतनाम

विनाशबाट तिमी जुन दिन उठ्छौ नि

यस्तो उठ्नु यस्तो उठ्नु यस्तो उठ्नु

कि शिर उठाउन नसकोस् अब

अर्को अमेरिकाले ।


१०.

सिरिया तिमी अब सूर्य बन

एउटा अँध्यारो सूर्य

जहाँ अँध्यारो अमेरिकाको सूर्यले उज्यालोको उल्टी गरोस् ।


११.

सिरिया आइ लभ यु ।

फुटेको भित्ताको प्वालबाट 

चिहाइरहेको तिम्रो आतङ्क अनुहारभन्दा सुन्दर 

संसारकै सुन्दर गुलाफ पनि छैन ।

सौन्दर्य आतङ्क हो । मृत्यु नै पिरती ।

सभ्यताले गर्न सकेको ठूलो उपलब्धि युद्ध हो जब ।

I lov u Syria ...


#. प्रेम र युद्ध


प्रेमभन्दा कहिल्यै टाढ़ा छैन

युद्ध


जसरी मृत्यु जहिल्यै

नजिक छ 

जीवनको


राजा पुनियानी

नब साहित्य डट ओआरजी

सम्बन्धित थप सामाग्रीहरु :

शृंखला कविता : युद्ध / राजा पुनियानी । - 2018-03-17

सिरिया
लाख लाख माइल टाढ़ा
यो कविले
तिम्रो बालकमा
आफ्नो मृत्यु स्वीकारेको छ
मलाई भोक लाग्दैछ
मृत्युको
मलाई अब जीवन जिउनु छ
सिरिया तिम्रो मृत्युको ।

शृंखला कविता: संङ्कल्प / निर बहादुर भण्डारी । - 2017-03-28

संङ्कल्प १ 
एउटा साँघुरो कोठाको परिधि भित्र,
कुप्पीको ढुलमुले प्रकाश मा,
आफ्ना भावना का विस्कुन हरु,
प्रतिबिम्बित भै रहेको त्यो कालो क्षण,
बाहिरी सन्नाटा झ्याउंकिरि का,

शृंखला कविता: हर्कबहादुर / राजा पुनियानी । - 2017-03-28

हर्कबहादुर १

आफ्नो जागित्रे रहर नथामे पनि
आफ्नो हरामी संसार नथामे पनि
आफ्नो गाथको भाग नथामे पनि
आफ्नो मान्छेको अपेक्षा नथामे पनि
मुख्य घर | नब साहित्य डट ओआजी

कृति समिक्षा तथा समालोचना





नव साहित्य डट ओआरजी

Main Road,Hetauda ,
Makwanpur
+977-9851177389
http://nabasahitya.org,
Email: nabasahitya@gmail.com

संचालन तथा प्रायोजनको हक सर्बाधिकार © नब साहित्य डट ओआरजी २०७२ मा सुरक्षित रहनेछ ।
329299 Times Visited.

Powered by: Exclusively Solution
Top
Content